நாம் தமிழர்கள் தானே ? தமிழுக்கு முதன்மை இடம் தருவது நமது கடமை அல்லவா ? உங்கள் முகநூல் கணக்கினைத் தமிழுக்கு மாற்றுங்கள் என்று பரப்புரை செய்து வருகிறோம். எப்படி மாறிக்கொள்வது என்பது பற்றிய விளக்கக் குறிப்பையும் தந்து வருகிறோம். அப்புறம் இன்னும் ஏன் தயக்கம் என்று கேட்டால், கிடைக்கும் மறுமொழி என்ன தெரியுமா ?
”எனக்குப் பிறமொழி
நண்பர்கள் நிறைய இருக்கிறார்கள். என் முகநூல் கணக்கின் பெயர்
ஆங்கிலத்தில் இருந்தால் தான் அவர்கள் என் முகநூலைப் பார்க்க முடியும்” என்பது தான் இந்த நண்பர்கள் தரும் விளக்கம் !
இத்தகைய நண்பர்கள் ஒரு கருத்தைச் சிந்தித்துப் பார்க்கவில்லை என்றே கருதுகிறேன் !
உங்கள் முகநூல் கணக்கு
.K.R.RAMASAMI என்னும் பெயரில் இருக்கிறது. உங்களுக்கு
தெலுங்கு நண்பர்கள் நிறைய இருக்கிறார்கள். அவர்களுக்குத் தமிழில்
எழுதப் படிக்கத் தெரியாது. உங்கள் தெலுங்கு நண்பர்களின் வசதிக்காக நீங்கள் உங்கள் முகநூலில் தெலுங்கிலா பதிவுகள் செய்கிறீர்கள்
? தமிழில் தானே பதிவுகள் செய்கிறீர்கள். அப்புறம்
K.R.RAMASAMY என்னும் பெயர் மட்டும் ஆங்கிலத்தில் இருந்து என்ன பயன்
? அந்தப் பெயரை “கு.இரா.இராமசாமி” என்று தமிழில் மாற்றுவதால் தெலுங்கு நண்பர்களுக்கு
என்ன இடையூறு ஏற்படப் போகிறது ?
நீங்கள் மும்பையில் பணிபுரிகிறீர்கள். உங்களுக்கு மராட்டிய நண்பர்கள் நிறைய இருக்கிறார்கள். அவர்கள் வசதிக்காக உங்கள் முகநூலில் மராட்டிய மொழியிலா பதிவுகள் செய்கிறீர்கள்
? தமிழில் தானே எல்லாப் பதிவுகளும் இருக்கின்றன ! அப்புறம் முகநூல் கணக்கின் பெயர் மட்டும் M.S.GOVINDASAMY என்று ஆங்கிலத்தில் இருப்பதால் என்ன பயன் ? இந்தப் பெயரை
மு.சா.கோவிந்தசாமி என்று தமிழில் மாற்றிவிட்டு,
முகநூலின் முகப்புப் படமாக உங்கள் நிழற்படத்தை வையுங்கள். உங்கள் நிழற்படத்தை அடையாளம் கண்டு உங்கள் மராட்டிய நண்பர்கள், உங்கள் முகநூலில் படம் பார்த்துக் களிக்கட்டும் !
பிறமொழி நண்பர்களுக்காக
என் முகநூல் பெயரை K.R.SEKAR என்று ஆங்கிலத்தில் வைத்திருக்கிறேன்
என்று இனி பொருந்தா வாதம் செய்யாதீர்கள். நீங்கள் எந்த மாநிலத்தில் அல்லது எந்த நாட்டில் வாழ்ந்தாலும்
உங்கள் அன்னையை விட்டுக்கொடுக்க மாட்டீர்கள் அல்லவா ? அது போல்
உங்கள் அன்னை மொழியையும் விட்டுக் கொடுக்கக் கூடாது !
தமிழன் என்பது நீங்கள்
சார்ந்துள்ள இனம். அந்தத் “தமிழன்”
என்னும் அடையாளத்தை உங்களுக்குத் தருவது “தமிழ்”.
உங்களை இந்த உலகத்திற்கு அடையாளப் படுத்திக் காட்டும் “தமிழ்” என்னும் உயர்ந்த தெய்வத்தை உதறிவிட்டு,
“ஆங்கிலம்” என்னும் அடுத்த நாட்டு அடையாளத்தைச்
சுமக்கலாமா ? அது உங்களுக்கு இழுக்கல்லவா ?
தாயைப் புறக்கணிப்பவன்
வாழ்க்கையில் முன்னேறவே முடியாது ! அதுபோல் தாய்மொழியைப் புறக்கணிப்பவனும்
முன்னேற முடியாது ! அறியாமை என்னும் இருளில் வீழ்ந்து கிடக்காமல்,
அறிவு என்னும் விளக்கு இருக்கும் பக்கம் வாருங்கள் ! உங்களுக்கு மகிழ்ச்சியுடன் வரவேற்புக் கூற தமிழ்க் குமுகாயம் காத்திருக்கிறது
!
இருபத்து நான்கு மணி நேரத்திற்குள்
உங்கள் முகநூல் கணக்கினைத் தமிழுக்கு மாற்றிவிட்டு ”நான் தமிழண்டா”
என்று மார் தட்டிக் கூவுங்கள் ! அதுவே நீங்கள்
“தமிழன்” என்பதற்கான அடையாளம் !
--------------------------------------------------------------------------------------------------------
ஆக்கம் + இடுகை,
வை.வேதரெத்தினம்,
ஆட்சியர்,
தமிழ்ப் பணி மன்றம்,
[திருவள்ளுவராண்டு:
2053, கன்னி (புரட்டாசி)11]
{28-09-2022}
-------------------------------------------------------------------------------------------------------
கருத்துகள் இல்லை:
கருத்துரையிடுக